Një 52-vjeçar humbi jetën pasi banesa e tij u përfshi nga flakët ndërsa bashkëshortja e tij ka mundur të dalë nga banesa pa pësuar dëmtime nga zjarri. Ngjarja u regjistrua rreth orës 02:10 të 14 prillit 2024 në lagjen Zogaj.

Me lot në sy, fqinji Riza Mullahu tregon se si shkoi të ndihmonte për të shpëtuar Jakup Çotajn, por ishte e pamundur. Ndërkohë, një tjetër problematikë që vihet re është nëse do të kishte një koordinim më të mirë dhe zjarrfikëset do të vinin në kohë dhe të pajisura me mjetet e duhura, atëherë jeta e 52 vjeçarit mund të shpëtohej.

“Riza Mullahu: Në orën 01:45 doli bashkëshortja jashtë e kërkonte ndihmë. Riza, hajde, se u dogj burri. E gjeta tek dera, djali erdhi shakull në oborr. Kërkonte ndihmë. Hyra në katin e parë. Më doli tymi e flaka përballë. Djali im u ngjit lart në katin e dytë e ishin gati duke mbetur lart nga tymi. U mundova ta fikja, por banesa u përfshi nga flakët sepse çatia ishte e veshur me katraman.”

“Djali lajmëroi zjarrfikëset. I doli Malësia e Madhe. I kanë thënë, nuk kemi punë. Djali i tha, po digjet shtëpia me njerëz brenda në Zogaj, lajmëroji. Jo, lajmëroi ti. Pastaj ka marrë policinë. Policia i ka thënë, lajmëro zjarrfikëset. Lajmëroi zjarrfikëset e Shkodrës e ata mund të kenë ardhur pas 40 minutash. Ishin 4 vetë. Kanë shpenzuar ujin, kanë mbushur cisternat, e kanë ardhur deri në orën 08:00 kanë qëndruar këtu, derisa e nxorrën viktimën. Ishte për ti bërë derman viktimës, por nuk u arrit” thotë ai.