Qeveria e Shqipërisë ka miratuar fondin prej 1.1 milionë euro për komunitetet fetare në vend. Vendimi u mor në një seancë të sotme të Këshillit të Ministrave, ku u përcaktua se komunitetet fetare do të përfitojnë nga ky fond për financimin e buxhetit të vitit 2024.
Sipas vendimit të qeverisë, nga ky fond do të përfitojnë katër komunitete fetare kryesore në Shqipëri: Komuniteti Mysliman i Shqipërisë, Kryegjyshata Botërore Bektashiane, Kisha Ortodokse Autoqefale e Shqipërisë dhe Kisha Katolike në Shqipëri.
– Komuniteti Mysliman i Shqipërisë do të përfitojë shumën prej 33.84 milionë lekë, e cila përfshin financimin e gjysmës së pagës minimale për punonjësit e administratës dhe institucioneve të arsimit.
– Kryegjyshata Botërore Bektashiane do të marrë 26.36 milionë lekë, të cilat do të përdoren për ndërtimin e Teqesë së Shtufit në Gjirokastër dhe për financimin e punonjësve të administratës.
– Kisha Ortodokse Autoqefale e Shqipërisë dhe Kisha Katolike në Shqipëri do të përfitojnë nga shuma e njëjtë prej 26.4 milionë lekë, të cilat do të shkojnë për financimin e punonjësve dhe institucioneve të tyre.
Vendimi i qeverisë bazohet në dispozitat kushtetuese dhe ligjore, dhe Ministria e Financave dhe Komiteti Shtetëror për Kultet janë ngarkuar me zbatimin e këtij vendimi. Fondi do të kalohet brenda muajit maj të vitit 2024 dhe hyn në fuqi menjëherë, siç përcaktohet në vendim.
