Aksioni i fundit i kryeministrit Edi Rama, duke importuar punonjës të administratës shtetërore për të mbushur një takim politik në Athinë, ngrit alarmin për shqetësime të thella rreth lirive demokratike dhe integritetit zgjedhor në Shqipëri.

Ky veprim, i shoqëruar me detyrimin për antarësim në Partinë Socialiste të punonjësve të administratës, tregon se sa larg shkon përhapja e presionit dhe keqpërdorimit të burimeve publike për të përfituar në fushatën zgjedhore.

Nëse punonjësit e administratës ndjehen të detyruar të marrin pjesë në aktivitete politike, ajo tregon se si përhapet ky presion për të imponuar votën brenda vendit gjatë zgjedhjeve. Kjo është një shkelje e qartë e ligjit dhe duhet të hetohet dhe ndëshkohet me vendosmëri.

Për të siguruar integritetin e zgjedhjeve të ardhshme, është e rëndësishme që Komisioni Europian dhe faktorët ndërkombëtarë të ndërhyjnë për të nxitur përmbylljen e Reformës Zgjedhore në kohë dhe adresimin e rekomandimeve të OSBE-ODIHR për të parandaluar keqpërdorimin e burimeve shtetërore dhe për të siguruar një garë të drejtë dhe të barabartë për të gjithë palët.

Shqipëria, një vend anëtar i NATO-s dhe kandidat për anëtarësim në BE, duhet të organizojë zgjedhje të lira dhe të ndershme në 2025, në mënyrë që të përforcojë demokracinë dhe të sigurojë një të ardhme europiane të qëndrueshme.