###
Detaje të reja janë zbardhur nga mediat greke në lidhje me vrasjen e 40-vjeçares shqiptare, Enkeleida Danaj, në Greqi. Ajo u godit me një thikë në bark dhe u la e vdekur në mes të rrugës në Menidi. Sipas raportimeve nga Zougla, vetëm pak ditë më parë, viktima kishte denoncuar bashkëshortin e saj, Eduard Danaj, për dhunë fizike, lëndime në trup, kërcënime dhe ofendime.
Policia greke dyshon se autori i vrasjes së shqiptares është pikërisht 50-vjeçari Eduard Danaj. Më 7 Maj, viktima e kishte denoncuar bashkëshortin se e kishte kapur prej fyti, i kishte lënduar krahun, kishte abuzuar me të dhe e kishte kërcënuar. Dëshmitare e dhunës ka qenë edhe vajza e tyre, e cila po ashtu është sulmuar nga i ati. Nënë e bijë konfirmuan për policinë se të dyja kishin përjetuar sulme të tilla edhe më parë nga 50-vjeçari.
Viktimës i ishte ofruar “mbështetje morale” dhe mundësia të transferohej në një ambient mikpritjeje për gratë e dhunuara. Atyre u ishte ofruar edhe “Butoni i Panikut”, të cilin viktima e pranoi, por nuk pati kohë ta aktivizonte.
Zougla thekson se autori i dyshuar i kësaj ngjarjeje pritej të dilte të premten para gjykatës në lidhje me sulmin ndaj ish-gruas dhe vajzës. Viktima kishte një listë të gjatë denoncimesh ndaj Eduard Danajt. Në Prill të vitit 2023, ajo e kishte kallëzuar partnerin, dhe po ashtu në Shtator 2022, ajo e kishte denoncuar për dhunë, çka çoi në arrestimin e Eduard Danajt. Sipas raportimeve, kishte një urdhër gjykate që çifti të mos jetonte në të njëjtën banesë, por viktima mendohet se ka pranuar që bashkëshorti të kthehej në shtëpinë e tyre që në vitin 2018.
Këto detaje zbulojnë një histori të gjatë dhune dhe abuzimi, e cila kulmoi në këtë tragjedi të rëndë. Hetimet vazhdojnë për të zbardhur plotësisht rrethanat e kësaj vrasjeje.
Trupi i pajetë i viktimës u pikas nga një kalimtar i rastit në një kryqëzim në Menidi. Mediat greke shkruan se 40-vjeçarja u gjet me thikën të ngulur në bark. Enkeleida ishte nisur në punë ku mendohet se autori i ka zënë pritë. Ai e goditi me thikë në stomak dhe më pas u zhduk. Krahas viktimës u gjet çanta me sendet e saj personale. Ndërkohë policia po këqyr kamerat e sigurisë si dhe po kërkon për dëshmitarë për të zbuluar më shumë rreth dinamikës së ngjarjes.
