Presidenti i Partisë së Lirisë, Ilir Meta, gjatë një takimi me strukturat në Berat, ka adresuar gjendjen e varrezave të dëshmorëve në këtë qytet. Meta theksoi se shkallët në hyrje të varrezave ishin shkatërruar dhe bëri thirrje për ndërhyrje të menjëhershme nga ana e kreut të Bashkisë Berat për t’i rregulluar ato.

“Sot kur erdha këtu në Berat pashë varrezat e dëshmorëve. Dhe më bëri përshtypje sesi ishin shkatërruar shkallët në hyrje, aty ku kalojnë dhe hyjnë çdo ditë qytetarët e Beratit. Edhe deputetët që vijnë, edhe kryetari i bashkisë, edhe prefekti, edhe ministrat, se për kryeministrin nuk i vë faj se kur shikon varrezat e dëshmorëve e kthen kokën në anën tjetër, se ka tmerr nga heronjtë. Heronjtë dhe patriotët i quan të çmendur, perversët janë idhujt e tij. Po e tregon me vepra këtë gjë dhe me projektligje,” tha Meta.

Meta theksoi rëndësinë e kujdesit ndaj varrezave ku prehen mbi 400 dëshmorë të Beratit dhe paralajmëroi se nëse nuk merren masa brenda një muaji, Partia e Lirisë Berat do të ndërhyjë vetë për t’i sistemuar, edhe pa leje.

“Unë dua t’i them kryetarit të bashkisë së Beratit, shumë turp, që varrezat e Beratit ku prehen mbi 400 djem dhe vajzat më të mira të Beratit që dhanë jetën në luftë, nëse nuk e merr mundimin t’i rregullojë e sistemojë, pastaj brenda një muaji Partia e Lirisë e Beratit është e detyruar që pa leje t’i rregullojë e sistemojë,” përfundoi Meta.

Kjo thirrje vjen si një kërkesë për veprime konkrete nga autoritetet lokale për të respektuar dhe kujdesur për vendet e shenjta ku prehen dëshmorët e luftës.