Komuniteti Mysliman i Shqipërisë-Myftinia Tiranë ka reaguar me shqetësim mbi aktin e pabazuar ligjërisht të një “martese” mes dy individësh të së njejtës gjini të mbajtur në ambientet e një institucioni shtetëror.
Në deklaratën e saj publike, Myftinia Tiranë i bën thirrje institucioneve të jenë të kujdesshëm ndaj ngjarjeve të tilla duke mos u profilizuar në drejtimin e kundërt me pjesën dërrmuese të votuesve dhe taksapaguesve shqiptarë. Gjithashtu, theksohet se zhvillimi i një procedure të tillë në kundërshtim me ligjin shqiptar dhe Kodin e Familjes së Republikës së Shqipërisë është një veprim i rrezikshëm për të legalizuar dhe normalizuar një proces që tenton të imponohet pa dëshirë përmes shkatërrimit të familjes dhe kulturës kombëtare.
Myftinia Tiranë mbetet e angazhuar tërësisht dhe fuqimisht në mbështetjen dhe promovimin e vlerave të familjes si thelbi i shoqërive të krijuara nga Zoti i Lartësuar për mbarëvajtjen e njerëzimit. Po ashtu, angazhohet në promovimin e çdo akti që synon lartësimin moral të ndërgjegjes kombëtare dhe çdo sipërmarrje që çon drejt mirëqenies publike materiale apo shpirtërore.