###

Më 24 maj, Lituania njoftoi se shtetet e Baltikut dhe pesë shtete të tjera të NATO-s, që gjenden në kufi me Rusinë, janë pajtuar për të ndërtuar një “mur me dronë” për të mbrojtur kufijtë e tyre nga “provokimet”.

Ministrja e Brendshme e Lituanisë, Agne Bilotaite, bëri publik planin pas bisedimeve me homologët e saj nga Estonia, Letonia, Finlanda, Norvegjia dhe Polonia. “Kjo është një gjë krejtësisht e re, një mur me dronë i gjatë nga Norvegjia në Poloni. Qëllimi është që të përdoren dronët dhe teknologji të tjera për të mbrojtur kufijtë tanë,” tha ajo për agjencinë e lajmeve BNS.

Plani për përdorimin e dronëve për mbrojtje erdhi për shkak të shqetësimeve të sigurisë në rajon, teksa po vazhdon lufta e Rusisë kundër Ukrainës. Sipas Bilotaite, ky sistem mbrojtës nuk do të përfshijë vetëm infrastrukturë fizike dhe sisteme të vëzhgimit, por edhe dronë dhe teknologji të tjera për të parandaluar provokimet nga shtetet jomiqësore dhe kontrabandën.

Përveç dislokimit të dronëve për të monitoruar vijat kufitare, këto shtete do të përdorin gjithashtu sisteme kundër dronëve për të ndalur dronët e armikut.

Ministrja Bilotaite nuk dha ndonjë afat kohor për zbatimin e këtij plani, por përmendi se shtetet pjesëmarrëse janë të përkushtuara për ta realizuar atë sa më shpejt të jetë e mundur.