Delegacioni i Parlamentit të Serbisë në mbledhjen e Asamblesë Parlamentare të NATO-s në Sofje ka dërguar një letër, ku kërkon që Kosova të mos i jepet statusi i anëtarit të asocuar.

Përfaqësuesit serbë u takuan me kreun e delegacionit amerikan në NATO, Michael Turner, dhe i dorëzuan letrën e kërkesës. Në këtë letër, Serbia bëri thirrje për të mos miratuar avancimin e statusit të Kosovës nga vëzhgues në anëtar të asocuar.

Asambleja Parlamentare e NATO-s, në të cilën Kosova synon të përparojë në statusin e saj, është një institucion që ndryshon nga vetë NATO-ja, por shërben si një lidhje ndërmjet NATO-s dhe parlamenteve të vendeve anëtare.

Anëtarët e asocuar të kësaj asambleje kanë të drejtën të paraqesin rezoluta dhe ndryshime në rezoluta dhe të jenë pjesë e aktiviteteve të saj, por ata nuk kanë të drejtë vote për raportet dhe nuk kontribuojnë në buxhetin e saj.

Ndërkohë, Kosova, që prej kohësh është delegacion vëzhgues me dy ulëse në këtë asamble, synon të zgjerojë përfaqësimin e saj në të. Megjithatë, Serbia shpreh shqetësimet e saj për këtë zgjerim, duke e quajtur atë një shpërblim për Prishtinën që po pengon dialogun dhe nuk po përmbush obligimet e marrëveshjeve të arritura në Bruksel.

Në këtë kontekst, zëvendëskryetarja e delegacionit serb, Natasha Jovanoviç, ka rikujtuar Asamblesë Parlamentare të NATO-s kompleksitetin e situatës në Kosovë, duke shtuar se çështjet territoriale duhet të zgjidhen përmes një marrëveshjeje.

Serbia akuzon Kosovën për moszbatimin e marrëveshjeve të arritura në dialogun në Bruksel dhe për mosformimin e Asociacionit të komunave me shumicë serbe, një marrëveshje e cila u është nënshkruar disa vite më parë. Për të gjitha këto arsye, Serbia po kërkon që Kosova të mos përparojë në statusin e saj në Asamblenë Parlamentare të NATO-s.