Algjeria ka përgatitur një projekt-rezolutë për Rafahun, të cilën do t’ua paraqesë anëtarëve të Këshillit të Sigurimit të OKB-së sot më 29 maj. Ambasadori algjerian, Amar Bendjama, njoftoi këtë gjatë një komunikimi me gazetarët, duke theksuar se rezoluta synon ndalimin e vrasjeve në Rafah.

“Do të jetë një projekt-rezolutë e shkurtër, ka si synim ndalimin e vrasjeve në Rafah,” tha ai. Ende nuk është e qartë se kur projekt-rezoluta do të shkojë për votim dhe nëse Shtetet e Bashkuara do ta bllokojnë atë me veto.

Në një zhvillim të lidhur, Shtetet e Bashkuara të Amerikës kanë ndaluar përkohësisht dërgimin e ndihmave për Gazën. Kjo ndalesë erdhi pasi një skelë ushtarake e sapondërtuar në brigjet e Gazës pësoi dëme nga moti i keq dhe baticat gjatë fundjavës. Një zyrtar amerikan për Al Arabiya English deklaroi të martën (28 maj) se skela do të riparohet dhe do të kthehet në funksion në portin izraelit të Ashdod, një proces që pritet të zgjasë rreth një javë.

Zëvendës zëdhënësja e Pentagonit, Sabrina Singh, konfirmoi këtë informacion dhe theksoi se skela do të rikthehet pasi të përfundojnë riparimet.