Dy persona janë arrestuar në Vlorë për vjedhjen e një sasie karburanti nga kamioni i një firme ndërtimi. Pas kallëzimit të rastit në Komisariatin e Vlorës, u bë e mundur identifikimi dhe arrestimi i dy personave të dyshuar: S.M., 65 vjeç, dhe M.K., 26 vjeç, të dy banues në Vlorë.
“Shërbimet e Komisariatit të Policisë Vlorë, pas marrjes së njoftimit për vjedhjen e karburantit nga kamioni i një firme ndërtimi, kryen të gjitha veprimet hetimore dhe, bazuar në provat e siguruara, finalizuan operacionin policor të koduar ‘Storm 21’. Si rezultat, u identifikuan dhe arrestuan autorët e dyshuar të vjedhjes, shtetasit S. M., 65 vjeç, dhe M. K., 26 vjeç,” thuhet ndër të tjera në njoftimin e policisë.
Hetimi zbuloi se S.M., ishte punonjës i firmës dhe shoferi i kamionit nga i cili vidhej karburanti në bashkëpunim me M.K. Policia, me arrestimin e tyre, përfundoi operacionin ‘Storm 21’, ndërsa materialet proceduriale i janë kaluar Prokurorisë për veprime të mëtejshme.
