Deputeti socialist Petro Koçi mbajti fjalën e tij në foltoren e Kuvendit, duke kujtuar dhunën e Sali Berishës në zgjedhjet e 1996 dhe duke e krahasuar atë me ngjarjen e fundit ku u hodh një molotov në protestën e opozitës para bashkisë, duke rrezikuar jetën e gazetarëve.
“Vdekja e kalit”, siç e quajti ai, është një histori që ka filluar në zgjedhjet e vitit 1996, kur Sali Berisha drejtonte opozitën. Në atë kohë, historia u shndërrua në një tragjedi ku komisarët politikë u shndërruan në shefat politikë të opozitës, duke përfshirë një ekstremist ideologjik që vazhdon të jetë në pushtet edhe sot.
‘E gjithë historia e PD-së është si te filmi ‘Vdekja e Kalit’ ku komisari politik u shndërrua në shef politik të opozitës së atëhershme,. Një ekstremist ideologjik që i tillë mbeti edhe pasi u ndryshua edhe forma e regjimit. Dje ka qenë 29 maj. 30 vjet më parë ka ndodhur masakra e Libofshës, ku falangat e bandave të Fierit të strukturuara në shtabin elektoral të Partisë Demokratike masakruan gjithë komisionerët e PS-së, njerëzit e thjeshtë, burra apo gra, të cilët jo vetëm pësuan fyerje të dinjitetit të tyre por edhe gjithë procesi u shndërrua në një falsifikim të pistë, të ndyrë elektoral duke vjedhur të gjitha votat dhe duke kthyer rezultatin e përgjakur në disa proces verbale.
Është e njëjta dorë që bëri 14 shtatorin, është e njëjta dorë që bëri 21 janarin. Është e njëjta dorë që hodhi molotovin pardje, e njëjta dorë dhe vazhdon komunisti i Partisë së Punës të jetë lideri shpirtëror gjoja i Partisë Demokratike edhe sot në vitin 2024. Jam dakord që lufta e klasave ka qenë një luftë e padenjë për një shoqëri civile. Janë masakruar njerëz, janë vrarë. Por edhe lufta antikomuniste e klasave ka qenë e padenjë.
Dua tju kujtoj se para pak kohësh ju fik jeta, gazetarit Zamir Dule. Gazetari u masakrua nga regjimi i Berishës dhe pasojat e atij masakrimi e çuan të humb jetë në një moshë relativisht të re. Por fati i tij është edhe i Remzi Hoxhës, dua të kujtoj vëzhguesit dhe komisionerët e PS në të gjithë vendin në vitin 96.’, deklaroi deputeti Petro Koçi nga foltorja e parlamentit.
