Dritan Nano është arrestuar si organizator i dhunës ndaj avokatit Sokol Mëngjesi, i cili ndodhet në gjendje të rëndë dhe është i intubuar prej 4 ditësh në spitalin e Traumës. Gjykata e Tiranës ka vendosur që ai të qëndrojë në burg, njësoj si Dorian Alia, një nga agresorët e sulmit ndaj avokatit. Të dy të akuzuarit kanë mohuar organizimin e sulmit, duke e cilësuar atë si një ngjarje rastësore.

Për tre agresorët e tjerë që janë ende në kërkim nga policia, Drivaldo Alia, Elton Kasaj dhe Romario Tabaku, është caktuar masa “arrest me burg” në mungesë.

Prokuroria e Tiranës ka zbutur akuzat ndaj të dyshuarve, duke rikualifikuar veprën penale nga “vrasje të funksionarëve publik e mbetur në tentativë” në “plagosje e rëndë me dashje kryer në bashkëpunim” dhe “kundërshtim dhe goditja e gjyqtarit, kryer në bashkëpunim”.

Gjendja shëndetësore e avokatit Sokol Mëngjesi mbetet e pandryshuar. Ai është ende në intubim në spitalin e Traumës dhe po monitorohet intensivisht nga stafi mjekësor. Nëse gjendja e tij do të mbetet e njëjtë për dy ditët e ardhshme, doza e qetësuesve mund të ulet gradualisht për të parë reagimin e pacientit.

Avokati u dhunua mëngjesin e 29 majit pasi la djalin e tij në kopsht në zonën e ish-bllokut. Dorian Alia, i cili u vetëdorëzua, ka pranuar se porositësi i sulmit ishte Dritan Nano. Dhuna kishte për qëllim të paralajmëronte avokatin që të tërhiqej nga padia kundër Nanos për një pronë të fituar me gjyq te kullat e Liqenit.

Ngjarja ka tronditur opinionin publik dhe ka ngritur shqetësime mbi sigurinë e funksionarëve publikë dhe zbatimin e ligjit në vend. Autoritetet po vazhdojnë hetimet për të siguruar drejtësi dhe për të identifikuar të gjithë të përfshirët në këtë akt të dhunshëm.