Vitin e kaluar, qeveria gjermane ndërmori hapa të rëndësishëm për të modernizuar ligjin e migracionit, duke lehtësuar rregullat për ardhjen e fuqisë punëtore në Gjermani. Këto ndryshime, të cilat kancelari gjerman Olaf Scholz i quajti “hap tjetër për modernizimin e Gjermanisë, hap tjetër për të siguruar rritjen ekonomike edhe për të ardhmen, dhe një hap tjetër që tejkalon paralizën e disa dekadave,” hyjnë në fuqi më 1 qershor.

Nga kjo datë, dy rregulla të rëndësishme hyjnë në fuqi, që do të kenë një ndikim të veçantë për Ballkanin. Ligjet e reja synojnë të lehtësojnë ardhjen e fuqisë së kualifikuar punëtore, duke u ofruar më shumë mundësi profesionistëve nga Ballkani dhe rajone të tjera për të punuar dhe jetuar në Gjermani.

Pas miratimit të këtyre ligjeve në Bundestag vitin e kaluar, pritet që këto ndryshime të sjellin një rritje të ndjeshme të migracionit të kualifikuar, duke ndihmuar kështu ekonominë gjermane të përballet me sfidat e një tregu pune gjithnjë e më të ngushtë dhe të plotësojë nevojat për fuqi punëtore në sektorë të ndryshëm.

Këto ndryshime ligjore janë pjesë e përpjekjeve më të gjera të Gjermanisë për të modernizuar kornizën e saj ligjore të migracionit dhe për të krijuar një mjedis më të hapur dhe mikpritës për profesionistët ndërkombëtarë, duke kontribuar kështu në zhvillimin ekonomik dhe shoqëror të vendit.