Kampet e emigrantëve në Shëngjin dhe në Gjadër do të jenë fokusi i takimit të Kryeministres italiane Giorgia Meloni gjatë vizitës së saj në Shqipëri të mërkurën.

Sipas axhendës zyrtare të publikuar nga Kryeministria e Italisë, Meloni pritet të mbërrijë në Shqipëri rreth mesditës, ku do të pritet nga Kryeministri Edi Rama. Pas kësaj, ata do të nisen drejt Lezhës për të inspektuar punimet e kryera deri më tani në dy kampet e emigrantëve, që janë pjesë e një marrëveshjeje të nënshkruar vitin e kaluar nga të dy krerët e qeverive.

Vizita e Melonit në Shqipëri pritet të përfundojë brenda ditës së mërkurë, dhe ende nuk është bërë e ditur nëse Kryeministrja italiane do të takohet me zyrtarë të tjerë përveç Ramës. Sa i përket kampeve të emigrantëve në Lezhë, të cilat do të administrohen nga shteti italian, punimet ende nuk kanë përfunduar, edhe pse ishte parashikuar që kampet të hapeshin në maj të këtij viti.