Mediat amerikane kanë raportuar se Presidenti Joe Biden pritet të nënshkruajë sot një urdhër ekzekutiv që do të kufizojë ndjeshëm numrin e personave që kërkojnë azil në kufirin SHBA-Meksikë.

Sipas zyrtarëve të administratës, me nënshkrimin e këtij urdhri, kufiri do të mbyllej menjëherë, sapo mesatarja e hyrjeve ditore në pikat kufitare të arrinte në 2,500 vetë. Aktualisht ky numër është shumë më i madh.

Presidenti do të bazohet në nenin në ligjin e miratuar para 72 vjetësh mbi Imigracionin dhe Shtetësinë, i cili i jep presidentit kompetenca të gjerë për të bllokuar hyrjen në vend të imigrantëve, pavarësisht nga lloji i vizave, kur një gjë e tillë besohet se “mbron interesat e Shteteve të Bashkuara”.

Mediat thonë se Presidenti Biden po ndërmerr këto masa pasi projektligji dypartiak mbi sigurinë e kufirit u refuzua në muajin shkurt nga shumica e republikanëve në Senat, përfshirë disa demokratë. Edhe ish-Presidenti Trump e kundërshtoi hapur këtë projektligj.

Disa kryebashkiakë të qyteteve pranë kufirit me Meksikën janë ftuar në Shtëpinë e Bardhë për të marrë pjesë në ceremoninë e nënshkrimit të urdhrit ekzekutiv.