Projektligji për Kombinatin Mekanik të Poliçanit, Çupi drejtuar PS: ” Hajdut total”

Seanca plenare e Kuvendit u përfshi në debate të ashpra lidhur me projektligjin

Për financimin e detyrimit të prapambetur të pagesës së punonjësve dhe ish-punonjësve të Kombinatit Mekanik Poliçan“.

Deputetja Dhurata Çupi akuzoi qeverinë për abuzime financiare gjatë vitit 2023, duke pretenduar se letrat me vlerë janë blerë për shuma të ulëta nga qytetarët dhe më pas janë dhënë oligarkëve.

Çupi e quajti projektligjin një akt të bërë me porosi dhe i akuzoi deputetët e mazhorancës për korrupsion dhe përfitim të padrejtë.

“Ky është një ligj që thjesht ka firmosur një deputet i PS. Është një projektligj që është i porositur, zoti Braçe,” deklaroi ajo.

Ajo kritikoi mazhorancën për ndryshime të shpeshta në ligje të rëndësishme dhe për vonesën në trajtimin e çështjes së letrave me vlerë.

“Ky ligj është ndryshuar rreth 8 herë dhe ajo që më bën përshtypje është se në 2023, afatet e letrave me vlerë kanë përfunduar dhe vijmë këtu 6 muaj pasi ka përfunduar afati,” theksoi Çupi.

Çupi akuzoi mazhorancën për veprime të pandershme dhe përfshirjen në praktika që favorizojnë biznesmenë të fuqishëm.

“Dhe vini këtu si të pashpirt që jeni, si të pamëshirshëm dhe hajdutë total, edhe këto letrat me vlerë, ua morët letrat me vlerë qytetarët, ua bletë me 5 lekë në 2023 duke u bërë presion,” tha ajo.

Debati në Kuvend vazhdoi me shkëmbime të ashpra akuzash ndërmjet deputetëve të opozitës dhe atyre të mazhorancës, duke reflektuar tensionet e vazhdueshme politike në vend.