Deputetja e PD, Jorida Tabaku, ka qenë e pranishme në një konferencë mbi Mekanizmat e Mbikëqyrjes së Investimeve të Huaja në Shqipëri, ku diskutimet kanë përfshirë dhe Delegatin e SHBA-së, të udhëhequr nga David Wisner.
Në një postim në rrjetet sociale, Tabaku thekson rëndësinë e masave parandaluese për investimet nga vendet jo miqësore me Shqipërinë, të cilat shpesh paraqesin një kërcënim për sigurinë kombëtare dhe NATO-n. Ajo vlerëson se Shqipëria duhet të ketë legjislacion dhe mënyra për të parandaluar këto ndërhyrje.
Postimi i plotë i deputetes së PD, Jorida Tabaku:
“Kënaqësi të isha pjesë e konferencës për Mekanizmin e Mbikqyrjes së Investimeve në të cilën pata mundësinë të diskutoja përpara Departamentit të Shtetit mbi Byronë dhe Çështjet Ekonomike në SHBA, charges d’affair të SHBA z. Wisner dhe kolegë të parlamentit mbi rëndësinë e mjeteve dhe mënyrave për të ruajtur sigurinë tonë kombëtare nga sulmet dhe goditjet e furishme të vendeve armiqësore me ne.
Një nga mënyrat se si mund t’ia arrijmë kësaj është duke implementuar politika dhe forma të testuara në Bashkimin e Europian dhe SHBA për të hetuar me kujdes çdo propozim të huaj që na vjen në sektorët kyç të ekonomisë dhe pasurive tona kombëtare.
Na duhet të mbrojmë vendin tonë nga rreziqet e ndikimeve malinje të vendeve jo miqësore. Një Shqipëri e fortë do të thotë një rajon i fortë. Një Shqipëri e suksesshme do të thotë një shoqëri më pranë qëllimeve tona gjeostrategjike.”
Pjesëmarrja e deputetes Tabaku në këtë konferencë shpreh përkushtimin për të ruajtur sigurinë dhe integritetin ekonomik të Shqipërisë nga ndikimet e vendeve armiqësore.
