Gazetarja Anduena Llabani ka deklaruar se hetimet e Prokurorisë së Posaçme (SPAK) për Ilir Metën dhe Monika Kryemadhin po shkojnë drejt përfundimit. Në emisionin “360 Gradë”, Llabani theksoi se pritet që shumë shpejt të vendosen masa sigurimi ndaj tyre.

“Unë mendoj që procesi i hetimit për çiftin po vjen drejt fundit. Ballafaqimi i fakteve dhe dëshmive të tyre, ose fjala e fundit përpara se ata të shkojnë drejt përfundimit dhe mbylljes së dosjes, janë dëshmitë e tyre, veç e veç. Dhe nuk është rastësi që kanë ardhur njëri pas tjetrit. Shumë shpejt do të ketë masë sigurimi. Të dy janë persona në hetim prej kaq vitesh dhe ka fakte konkrete për të cilat do të kenë një ngarkesë penale”, theksoi ajo.

Kjo deklaratë e gazetares vjen në një kohë kur hetimet për çështjet e Metës dhe Kryemadhit kanë qenë në fokus të mediave dhe opinionit publik. Dyshimet për përfshirjen e tyre në veprimtari të paligjshme kanë ngritur shumë pikëpyetje dhe pritshmëri për zhvillimet e ardhshme në drejtësi.