Deputetja Zheni Gjergji deklaroi se hetimet për abuzimin me pacientët në Spitalin Onkologjik duhet të jenë në duart e SPAK (Struktura e Posaçme Kundër Korrupsionit dhe Krimit të Organizuar) dhe të shkojnë deri te përgjegjësit në krye të qeverisë. Ajo theksoi se pavarësisht denoncimeve të opozitës dhe mediave, nuk janë marrë masa nga autoritetet.

Gjergji tha se: “SPAK dhe organet e Drejtësisë duhet të angazhohen në një hetim të thelluar për mungesën e medikamenteve pranë Onkologjikut dhe shërbimet e tjera spitalore. Është provë besimi për SPAK që kësaj problematike skandaloze të mungesës së medikamenteve, të mos trajtimit shëndetësor të duhur, vjedhjeve dhe abuzimeve t’i japë përgjigje me forcën e ligjit. Përpara se media të hidhte dritë dhe prokuroria të vepronte, Rama dhe Manastirliu e dinin mirë gjendjen, por nuk ndërmorën asnjë veprim.”

Ajo përmendi se brakiterapia dhe ortovoltazhi nuk kanë funksionuar për një periudhë të gjatë në vitin 2022, duke hequr të drejtën e jetës për rreth 600 gra. Gjithashtu, aparatura e kobaltit ka qenë jashtë funksionit për vite me radhë, duke qëndruar në korridoret e Spitalit Onkologjik si dëshmi e vlerës së ulët që i jepet jetës.

Gjergji përfundoi: “Krimet në shëndetësi kanë emër, dhe për të pasur drejtësi të vërtetë, prangat duhet të kërcasin edhe më lart, në krye të punëve.”