Ulsi Manja, Ministri i Drejtësisë, gjatë fjalës së tij në Kuvendin e Shqipërisë, ka ndalur tek skandali në spitalin Onkologjik dhe vetëvrasja e Pal Trashajt, i cili piu fostoksinë para dyert e SPAK për shkak të problemeve që kishte me një mikrokredi.

“Rasti tek Onkologjiku është zbardhur tërësisht me hetime proaktive të Prokurorisë dhe sektorit të krimit ekonomik, për të cilat duhet t’u falenderojmë ata. Fillimisht, ai ka nisur si rast kontrabande ilaçesh dhe falë interesit të madh publik që ka përcjellë këtë rast, u finalizua me sukses për publikun. Është e rëndësishme që ky rast të trajtohet me seriozitet dhe të zbardhet plotësisht nga drejtësia, pasi kjo nuk është një çështje për gjyq publik. Ne e kemi dënuar rastin dhe presim që hetimet të zbardhin plotësisht përgjegjësinë penale dhe të gjithë personat e implikuar në këtë ngjarje të rëndë.”

Lidhur me rastin e mikrokredive, Ministri Manja shtoi: “Unë kam zgjedhur të hesht dhe do të vazhdoj të bëj kështu, pasi mbrojtja e sistemit bankar është një çështje e sigurisë kombëtare. Mbrojtja e qytetarëve që kanë marrë kredi në banka apo institucione të tjera është po ashtu një çështje e rëndësishme për mbrojtjen e interesit publik. Është ligji ai që ndan qartësisht rolin tonë, dhe kjo detyrë nuk i përket vetëm opozitës, por edhe mazhorancës, për të mbrojtur interesin publik nga sulmet dhe për të ruajtur stabilitetin e sistemit bankar nga presionet politike.”

Manja gjithashtu informoi: “Më 31 maj 2024, 11 përmbaruesve privatë u është hequr licenca dhe ata aktualisht janë nën hetim penal nga Prokuroria e Tiranës. Ministria e Drejtësisë po bashkëpunon ngushtë me hetuesit penalë për të siguruar se të gjithë ata që shkelin ligjin dhe përdorin praktika të paligjshme do të përgjigjen për veprimet e tyre para drejtësisë. Ne kemi bërë detyrën tonë pa hezitim.”