Kuvendi i Shqipërisë ka refuzuar me votë kërkesën për interpelancë të kërkuar nga kreu i grupit të PD-së, Gazment Bardhi, lidhur me emërimin e këshilltarit të jashtëm Florian Coldea, i cili sipas mediave rumune akuzohet se është ish-agjent i shërbimeve sekrete rumune dhe i përfshirë në trafik ndërkombëtar drogash.
Kryetarja e Kuvendit, Lindita Nikolla, në përgjigjen e saj ndaj kërkesës së Bardhit, shkroi se kërkesa për interpelancë ishte bërë për provokim dhe nuk ishte në përputhje me rregulloren e Kuvendit, prandaj nuk do të pranohej.
Në fjalën e tij 10-minutëshe në foltore, Bardhi tha se kryeministri Edi Rama ka frikë të japë llogari për veprimtaritë e tij.
Lindita Nikolla: “Ju njoftoj se në Kuvendin e Shqipërisë është depozituar kërkesa me nr.2535 protokolluar më 27 qershor 2024 nga kreu i grupit parlamentar të PD për interpelancë urgjente me kryeministrin Edi Rama. Kërkesa për interpelancë lidhet me dhënien e informacioneve dhe shpjegimeve për marrëdhënien e kryeministrit dhe këshilltarit të tij të jashtëm Florian Coldea, si dhe veprimtarinë këshillimore që ai ka kryer për kryeministrin e Shqipërisë.
Në shkresën me nr. protokollit 2535 datë 3 korrik 2024, drejtuar zotit Bardhi, kam argumentuar mospranimin e kërkesës për interpelancë pasi kjo nuk është në përputhje me rregulloren e Kuvendit. Bazuar në paragrafin e parë të rregullores së Kuvendit, përmes kërkesës për interpelancë me kryeministrin kërkohet të merren shpjegime për motive, synime, qëndrime të këshillave të ministrave ose lidhur me aspekte të rëndësishme të veprimtarisë së tyre.
Gazment Bardhi: “Kryeministri është i detyruar të përgjigjet për kërkesat për interpelancë. Rama ka frikë të japë llogari për lidhjet e tij me krimin e organizuar dhe aferat ku vetë është përfshirë që nga dita e parë që është emëruar kryeministër i Shqipërisë. Kërkuam interpelancë sepse kemi prova se kryeministri ka emëruar si këshilltar të jashtëm një ish-agjent të shërbimeve sekrete rumune, Florian Coldea. Është shumë e rëndësishme të dimë çfarë ka këshilluar dhe pse i ka marrë lekët nga taksat e qytetarëve shqiptarë, dhe t’i thuhet se është një çështje private. Na duhet të dimë pse i ka marrë lekët dhe pse dyshohet se një ish-agjent i shërbimeve sekrete është përfshirë në një linjë trafiku ndërkombëtar drogash nga Meksika në Shqipëri dhe Rumani.
Nga ana e tij, kreu i grupit PS, Bledi Çuçi, tha se Coldea nuk ishte më këshilltar i Ramës, ndërsa deputetët e PD-së akuzuan se Rama po injoronte kërkesat e opozitës.
“Koha kur Damir Fazllic ishte në Këshillin e Sigurisë ka kaluar. Nuk ka asnjë krahasim të marrësh një person nga lumi i mafias sllave dhe ta vendosësh në krye të Këshillit të Sigurisë”, deklaroi kreu i grupit të PS.
Në një moment, pati debate mes Bardhit në foltore dhe Bashës në karrigen e tij, që kaloi në përdorimin e një gjuhe ofenduese ndaj njëri-tjetrit. Deputetët e PD-së dolën në foltore për të kundërshtuar vendimin për të refuzuar kërkesën e Bardhit. Kjo detyroi Nikollën të ndërpresë seancën për 5 minuta.
Interpelanca dhe vakancat e KLGJ dhe KLP
Në Kuvend sot janë dhe 2 interpelanca të kërkuara nga PD me ministren e Shëndetësisë pas skandalit të Onkologjikut, ku mjekët zhvatnin pacientët me tumor dhe i orientonin drejt klinikave private. Kërkesat për interpelancë janë bërë nga deputeti Arbi Agalliu i grupit të Basha dhe një nga PD.
Në Kuvend do të mbahet edhe raundi i dytë i votimit për plotësimin e vakancave në KLGJ dhe KLP. Dy kandidatët e dërguar nga Komisioni i Ligjeve në Kuvend për KLGJ janë Erind Mërkuri dhe Albens Tabaku, ndërsa për KLP janë Artan Reci dhe Bedar Bajri. Nëse opozita dhe mazhoranca nuk gjejnë konsensus për të miratuar vakancat me 84 vota, procesi do të ripërsëritet me raundin e tretë.
Në rendin e ditës është parashikuar edhe raportimi për veprimtarinë e vitit 2023 të disa institucioneve, si KQZ, AMF, Komisioneri për të Drejtën e Informimit dhe Mbrojtjen e të Dhënave Personale.
