Partia Socialiste ka zyrtarizuar kandidaturën e saj për zgjedhjet e pjesshme që do të mbahen më 4 gusht në Himarë. Kandidati i selisë rozë është Vangjel Tavo.

Pak ditë më parë, presidenti i vendit, Bajram Begaj, caktoi datën 4 gusht për mbajtjen e zgjedhjeve në Himarë. Qytetarët e Himarës do të shkojnë në kutitë e votimit për të zgjedhur një kryetar të ri Bashkie në këtë datë. Presidenti Begaj e dekretoi këtë datë pas një takimi në presidencë me kryekomisionerin Ilirjan Celibashi, duke theksuar se ajo përfaqëson një alternativë optimale për përgatitjen dhe zhvillimin e një fushate të rregullt zgjedhore, duke marrë parasysh rrethanat dhe ngarkesën që sjell sezoni veror për bashkinë e Himarës.

Aktualisht, kjo bashki drejtohet nga kryetari i komanduar Arqile Bollano, pas dorëheqjes së Blerina Balës më 5 qershor. Më herët, në detyrë ka qenë Jorgo Goro, i cili u arrestua me urdhër të SPAK më 23 mars.