Gjykata e Lezhës ka dënuar me burgim të përjetshëm Dorjan Keqin, i akuzuar si bashkëpunëtor në vrasjen e ish-drejtorit të Tensionit të Lartë për Veriun, Saimir Jaku, në një ngjarje të ndodhur në vitin 2016 në Rrëshen. 42-vjeçari nga Kruja, me banim në Kurbin, u shpall fajtor për veprat penale “Vrasja në rrethana të tjera cilësuese” e kryer në bashkëpunim dhe “Armëmbajtja pa leje”.

Keqi, që prej arrestimit dhe gjatë gjykimit, ka mohuar vazhdimisht lidhjen e tij me krimin dhe ka refuzuar të bashkëpunojë me drejtësinë në këmbim të lehtësimit të dënimit. Prokuroria, përmes provave shkencore, arriti të zbardhë ngjarjen dhe të provojë fajësinë e tij, edhe pse financuesi i atentatit mbetet i paidentifikuar.

Dorjan Keqi u arrestua në shtator të vitit 2022, pasi u kap duke drejtuar mjetin pa patentë dhe në gjendje të dehur. Identifikimi i tij u bë përmes shenjave të gishtërinjve që provuan përfshirjen e tij në vrasjen e Saimir Jakut, në bashkëpunim me persona të tjerë ende të paidentifikuar.

Ngjarja e rëndë ndodhi në shtator të vitit 2016 në një lokal në qytetin e Rrëshenit, ku Saimir Jaku u qëllua me breshëri plumbash teksa po pinte kafe. Një person tjetër mbeti i plagosur gjatë këtij atentati.