Partia Demokratike e Himarës ka dalë dje kundër kandidaturës së Petro Gjikurisë, të propozuar nga koalicioni “Bashkë Fitojmë” për zgjedhjet e 4 gushtit për kryetar bashkie në Himarë. Kryetarja e PD-së në Himarë, Afrovita Dhimojani, shprehu përmes një postimi në rrjetet sociale pakënaqësinë e saj për këtë vendimmarrje, duke theksuar se dega e saj nuk është njoftuar dhe as konsultuar për këtë kandidaturë.
“Ditën e sotme u zyrtarizua kandidatura e Koalicionit BF, z.Petro Gjikuria për zgjedhjet e pjesshme të 4 Gushtit. Si drejtuese e PD Himarë, u informova si të gjithë qytetarët nga mediat për këtë vendimmarrje politike. Ndjej detyrimin dhe angazhimin për të sjellë në vëmendje se ne si degë, nuk jemi informuar e as konsultuar për sa i përket kandidaturës, por jemi vendosur para faktit publik. Nuk është e drejtë që lufta dhe angazhimi i PD Dega Himarë prej më shumë se një viti intensiv, të shpërfillet pa u konsideruar, duke luajtur me Himarën dhe fatin e saj. Duke mos e njohur, nuk dua të paragjykoj kandidaturën e zyrtarizuar si një alternativë për më të mirën e Himarës, jemi besimplotë për fitoren e Datës 4 Gusht,” shkroi ajo.
Kjo deklaratë tregon tensionet dhe mospajtimet brenda partisë për kandidaturën e propozuar, dhe ngrit dyshime mbi procesin e vendimmarrjes në kuadër të koalicionit.
