Gjashtë turistë janë gjetur të vdekur në suitën e një hoteli luksoz në Bangkok, Tajlandë. Hetimet e zhvilluara nga policia tajlandeze kanë provuar se turistët janë helmuar nga pijet e mbushura me cianid.

Sipas policisë, një anëtar i grupit ka marrë jetën dhe ka vrarë pjesën tjetër duke hedhur në filxhanët e çajit lëndën helmuese. Testet zbuluan kimikatin vdekjeprurës në gjashtë filxhanët e çajit që ndodheshin në dhomën e hotelit. Bazuar në intervistat me një të afërm, policia beson se vdekjet mund të lidhen me një mosmarrëveshje biznesi.

Të vdekurit ishin vietnamezë dhe dy prej tyre kishin nënshtetësi amerikane, ndaj FBI ka hyrë në lojë duke ndihmuar autoritetet tajlandeze. Policia tajlandeze tha se besonte se helmimet ndodhën të hënën pasdite, pasi grupi porositi ushqim dhe çaj anglez në dhomën e tyre në katin e pestë të hotelit Grand Hyatt Erawan, në lagjen më të famshme tregtare në Bangkok. Kur stafi i shërbimit mbërriti në dhomën e hotelit, ata panë vetëm një nga gjashtë turistët, një grua 56-vjeçare. Sipas policisë, ajo mori ushqimin dhe pijet dhe i tha stafit të hotelit se nuk kishte nevojë që çaji të shërbehej.

Dëshmitë u bënë publike nga Noppasin Poonsawat, zëvendëskomandant i Byrosë së Policisë Metropolitane. “Gjithçka filloi pas orës 13:57 të së hënës, pasi stafi i hotelit solli gjashtë filxhanë çaji dhe ushqime. Ne gjetëm cianid në gjashtë gota. Sipas CCTV, nuk kishte asnjë tjetër – përveç gjashtë anëtarëve të grupit – që hyri brenda asaj dhome”, tha Noppasin.

Viktimat janë shtetasit vietnamezë Thi Nguyen Phuong, 46 vjeç, bashkëshorti i saj, Hong Pham Thanh, 49 vjeç, Thi Nguyen Phuong Lan, 47 vjeç dhe Dinh Tran Phu, 37 vjeç, dhe shtetasit amerikanë Sherine Chong, 56 vjeç dhe Dang Hung. Policia po analizon pamjet e plota të lëvizjeve të tyre në të gjithë Bangkokun për të gjetur të dhëna që mund të ndihmojnë hetimin.