Këshilli i Ministrave ka miratuar sot vendimin për zgjerimin e listës së barnave të rimbursueshme nga Fondi i Kujdesit Shëndetësor, një masë që do të ndihmojë pacientët që vuajnë nga një sërë patologjish.

Në një deklaratë për mediat pas mbledhjes së qeverisë, ministrja e Shëndetësisë dhe Mbrojtjes Sociale, Albana Koçiu, theksoi rëndësinë e këtij vendimi për pacientët që trajtohen me barna dhe medikamente nga mjekët e familjes për diagnozat e tyre.

“Në listën aktuale të barnave të rimbursueshme kemi 1191 medikamente, ndërsa me vendimin e sotëm kësaj liste i shtohen edhe 50 medikamente të reja, nga të cilat 38 principe aktive dhe 18 forma doza të reja,” deklaroi Koçiu.

Ajo shtoi se me shtimin e këtyre medikamenteve të reja, lista e barnave të rimbursueshme arrin në rreth 1345 medikamente, të cilat do të rimbursohen nga buxheti i shtetit. Këto barna do të mbështesin diagnoza dhe patologji të sëmundjeve onkologjike, diabetike, kardiovaskulare, pneumologjike dhe të tjera patologji të rëndësishme.

Ky vendim pritet të lehtësojë ndjeshëm barrën financiare për pacientët dhe të përmirësojë aksesin e tyre në trajtimet e nevojshme mjekësore.