Kolegji i Apelit i Gjykatës së Bosnjë-Hercegovinës ka dënuar Almir Sarajliç Roki, një ish-pjesëtar i Ushtrisë Boshnjake të Bosnjë-Hercegovinës, me 15 vjet burg për krime lufte, duke reduktuar dënimin e tij nga 20 vjet që ishte në vendimin e shkallës së parë. Ndërkohë, shtatë të akuzuar të tjerë, ish-komandantë dhe anëtarë të Brigadës 325 të Ushtrisë së BiH-së, janë liruar nga të gjitha akuzat.

Sarajliç u shpall fajtor për vrasjen e të paktën 12 ushtarëve të Këshillit Kroat të pMbrojtjes (HVO) më 22 dhjetor 1993, pas një sulmi të Ushtrisë Boshnjake të BiH-së në pozicionet pranë fshatrave kroate Križançevo Selo, Šafradin dhe Dubravicë afër Vitezit. Viktimat ishin dorëzuar dhe çarmatosur, me disa prej tyre të plagosur dhe njëri prej tyre plotësisht i paaftë për të lëvizur. Sipas aktgjykimit, Sarajliç i ka çuar në një llogore ku i ka qëlluar për vdekje.

Pavarësisht insistimit të Prokurorisë së BiH-së për përgjegjësinë komanduese të të akuzuarve të tjerë, vetëm Sarajliç u dënua për këtë krim. Kolegji i Apelit vlerësoi se dënimi me 15 vjet burg pasqyron peshën e krimit të kryer nga Sarajliç. Ai u arrestua vitin e kaluar në aeroportin e Sarajevës dhe prej disa muajsh ndodhet në paraburgim.

Vendimi ka shkaktuar zemërim te kroatët dhe përfaqësuesit e familjeve të viktimave, të cilët shprehën indinjatën e tyre për lirimin e shtatë të akuzuarve dhe reduktimin e dënimit të Sarajliçit.