Prokuroria e Posaçme (SPAK) ka përfunduar hetimet dhe ka dërguar në gjykatë Jusel Micin dhe Mendim Domin, të akuzuar për mashtrime të mëdha përmes call center-eve ndaj qytetarëve europianë. Sipas SPAK, dëmi i shkaktuar nga këto mashtrime arrin në 3 milion euro, ndërsa ka edhe shumë raste të pa kallëzuara.
Jusel Mici dhe Mendim Domi akuzohen për veprat penale të “Mashtrimit kompjuterik”, “Krijimit të grupit të strukturuar kriminal”, “Fshehjes së të ardhurave” dhe “Pastrimit të produkteve të veprës penale ose të veprimtarisë kriminale”. Mici është akuzuar për kryerjen e këtyre veprave në bashkëpunim me Mendim Domin, i cili gjithashtu akuzohet për “Mashtrimin kompjuterik”, “Pjesëmarrjen në grup të strukturuar kriminal”, “Fshehjen e të ardhurave” dhe “Pastrimin e produkteve të veprës penale ose të veprimtarisë kriminale”.
Sipas SPAK, Mici dhe Domi ishin organizatorë dhe pjesëtarë të një grupi të strukturuar kriminal që kryente veprat penale të mashtrimit kompjuterik dhe pastrimit të parave.
Mashtrimi me Shoqëri Fiktive
Mashtrimi “online” ishte i lidhur me investime në letra me vlerë dhe kriptovaluta, dhe përdorimin e shoqërive fiktive si Capitalcom Investment, Direct Coin Limited, Lead Secure Ltd, Finex Group Ltd, Futurus X OU, Luxor, Mm Consulting S.R.S.S., dhe Estra. Këto shoqëri ishin përdorur për kalimin e vlerave monetare të mashtrimit, duke hapur llogari rrjedhëse në vende të ndryshme si Lituani, Britani e Madhe, Belgjikë, Luksemburg, Gjermani dhe Itali.
Grupi përdorte faqe interneti për të reklamuar aktivitetin dhe call center-e në Itali dhe Shqipëri për të kontaktuar viktimat dhe i bindnin ato të investonin në programe të rreme. Viktimat ishin të detyruar të derdhnin shuma të konsiderueshme në llogaritë e shoqërive fiktive, dhe menjëherë pas marrjes së parave, këto do të konvertoheshin në kriptovaluta dhe do të zhdukeshin.
SPAK njofton se dëmi ekonomik i shkaktuar arrin në 3 milion euro, megjithëse dyshohet se kjo vlerë mund të jetë shumë më e lartë, duke marrë parasysh se disa të dëmtuar nuk kanë raportuar ende mashtrimet që kanë përjetuar.
