Në Kongresin e Partisë Socialiste, Kryeministri Edi Rama nuk i kurseu kritikat për bashkëpunëtorët e tij, duke përfshirë një mesazh të fshehtë për ish-bashkëpunëtorin e tij më të afërt, Arben Ahmetaj, i shpallur në kërkim. Rama, ndërsa fliste për korrupsionin dhe protestat e organizuara para Bashkisë së Tiranës, përdori një gjuhë të ashpër për të shprehur qëndrimet e tij. Ai u shpreh: “minj që dalin nga vrima si tigra sy shqyer nga presioni që i bën në stomak kaçkavalli i mykur.” Ahmetaj, i njohur me nofkën “tigri”, u duk se ishte target i këtij komentari.

Rama vazhdoi me një tjetër shprehje: “qime prapanicash që bëjnë si lajmëtarë të kiametit.” Ky koment u interpretua si një tjetër aluzion për deklaratat e Ahmetajt nga arratia, ndërkohë që ky i fundit pritet të japë një intervistë të re në televizionin e familjes Berisha.

Në fjalën e tij, Rama theksoi se lufta kundër korrupsionit është përballur me kritika dhe denoncime të përditshme. Ai tha: “Unë di të them një gjë. Di të them me siguri se lufta antikorrupsion me denoncime të përditshme e baltë të përditshme që na bëhen nga i ziu, nga i bardhi, nga i gjithë cirku i tyre që na bëhen me kloun e arusha që turren tek Bashkia e Tiranës si te torta e pavarësisë, e në vend të saj kafshojnë murin. Me minj që dalin nga vrima si tigra sy shqyer nga presioni që i bën në stomak kaçkavalli i mykur. Apo me qime prapanicash, të më falë prapanica për shprehjen, që bëjnë si lajmëtarë të kiametit, nuk pijë ujë me shqiptarët. Zero, zero!”

Rama përmendi gjithashtu rëndësinë e drejtësisë të pavarur nga politika dhe shprehu besimin se kjo është një mundësi e artë për të realizuar atë që nuk ka ndodhur kurrë më parë në Shqipëri: një drejtësi të aftë të ngrejë akuza për persona politikë.