Një protestë e ashpër ka shpërthyer në aksin rrugor Kashar-Thumanë, ku disa qindra banorë nga Krujë, Fushë-Krujë dhe Thumanë kanë bllokuar rrugën për shkak të mungesës së nyjeve lidhëse ndërmjet rrugës së re dhe rrugës ekzistuese. Kjo situatë ka shpërthyer në një moment kur Ministria e Infrastrukturës, e drejtuar nga Belinda Blloku, dhe ARRSH, institucion nën varësinë e saj, nuk kanë ofruar asnjë përgjigje për kërkesat e mbi 80 mijë banorëve të prekur nga ndërtimi i rrugës së re.

Banorët kërkojnë që të implementohen nyje lidhëse sipas projektit fillestar për të lehtësuar aksesin midis dy akseve rrugore. Ata argumentojnë se mungesa e këtyre nyjeve ka rënduar ndjeshëm jetën e tyre dhe ka sjellë probleme të mëdha për bizneset e tyre, duke i çuar drejt falimentit.

Protesta ka shpërthyer në përplasje fizike me policinë, e cila është përpjekur të zhbllokojë aksin duke përdorur forcën për të zhvendosur banorët. Protestuesit, disa prej të cilëve kanë mbajtur flamuj kombëtarë dhe amerikanë, kanë krijuar bllokime të gjata të trafikut në të dy anët e autostradës. Policia ka vazhduar të ndërhyjë për të rikthyer normalitetin në aksin rrugor, duke shtyrë banorët anash autostradës.