Dëshmia e dy infermiereve të azilit të pleqve, të cilat aktualisht janë në paraburgim pas vdekjes së një të moshuari si pasojë e dhunës së shokut të dhomës, ka hedhur dritë mbi ngjarjen. Ato kanë deklaruar se fillimisht nuk e kishin menduar se situata ishte aq serioze sa për të lajmëruar menjëherë autoritetet. Sipas tyre, menduan se Virxhil Vesho, viktima, kishte ndërruar jetë për shkak të një rrëzimi aksidental si pasojë e moshës së tij të thyer, dhe jo si rezultat i dhunës së ushtruar nga Zyhdi Shehu, shoku i tij i dhomës.

Infermieret shpjeguan se kur vunë re dëmtimet në trupin e viktimës, supozuan se ato ishin shkaktuar nga një rrëzim. Në mëngjesin e asaj dite, ato kontaktuan një agjenci funerale për të marrë trupin e të ndjerit. Kur agjencia u rikthye dhe konstatoi dëmtime të shumta në trupin e Vesho, ata lajmëruan pronarin e azilit, i cili më pas njoftoi policinë. Infermieret theksuan se nuk kishin qëllim të fshihnin ngjarjen, por nuk e kishin kuptuar se bëhej fjalë për një vrasje deri në momentin që u informuan nga agjencia funerale.

Në fillim nuk e menduam se kishim të bënim me vrasje dhe nuk e menduam dhe e dinim që duhet të lajmëronim policinë. Pasi e pamë menduam që është rrëzuar dhe ka ndërruar jetë. Edhe për shkak të moshës së thyer nga rrëzimi aksidental menduam që i ka ardhur vdekja. Në fillim kemi marrë në mëngjes agjencinë funerale në telefon dhe i kemi thënë për të marrë trupin. Më pas ata u rikthyen dhe na treguan se viktima kishte dëmtime të shumta. Më pas Agjencia funerale ka lajmëruar pronarin e Azilit. Pronari më pas lajmëroi policinë. Nuk ishte qëllimi ynë që të fshihnim ngjarjen.