Ditën e sotme, një incident ka ndodhur në Vlorë ku një qytetar është dhunuar nga Vasil Bedinaj, pronari i tre Hoteleve ‘Regina’. Raportohet se qytetari po i ankohej Bedinajt për hapësirat e plazhit që hoteli i Bedinajt kishte zënë. Në një video të publikuar në rrjetet sociale, Bedinaj shihet duke e goditur qytetarin me grusht në fytyrë. Qytetari reagon, por ndërhyrja e disa personave të tjerë e ndalon përshkallëzimin e konfliktit fizik.

Një i afërm i Bedinajt ka deklaruar se zënka ka qenë për hapësirat e ‘Jet Ski’ që qytetari kishte zënë.

Kush është Vasil Bedinaj?

Vasil Bedinaj është pronari i rrjetit të hoteleve dhe restoranteve “Regina”. Në dhjetor të vitit 2023, ai u hetua në gjendje të lirë nga policia për ndërtim pa leje në zonën e Radhimës, ku po ndërtonte një kat të gjashtët pa leje në një objekt me leje 5-katësh.

Në vitin 2016, Bedinaj ishte shenjestra e një atentati të dështuar me eksploziv C-4 në zonën e “Liqenit të Thatë” në Tiranë.

Në vitin 2019, përmes kompanisë “Hotel Regina-Group”, Bedinaj iu drejtua institucioneve të ndryshme si Bashkia Vlorë, prefektura Vlorë, Ministria e Turizmit, Ministria e Mbrojtjes, Direktorisë së Përgjithshme Detare, Agjencisë së Bregdetit dhe Agjencisë së Zonave të Mbrojtura për të ngritur një stacion plazhi në Ishillin e Sazanit.