Një ngjarje e rëndë ka ndodhur në Pogradec, ku një 42-vjeçar, Egli Proga, humbi jetën më 10 gusht. Fillimisht u raportua se Proga kishte ndërruar jetë si pasojë e një rënieje në rrugë në gjendje të dehur. Megjithatë, burime për Shqiptarja.com bëjnë të ditur se ai është rrahur për vdekje dhe ka ndërruar jetë më pas në spitalin e Pogradecit.

Autori i dyshuar i ngjarjes është 29-vjeçari Denis Meçi, i cili ishte larguar nga vendi i ngjarjes një ditë më parë, por është arrestuar më vonë nga blutë e Pogradecit. Ngjarja ka ndodhur pas një sherri për motive të dobëta, ku të dy personat e përfshirë ishin në gjendje të alkoolit dhe janë konfliktuar fizikisht jashtë një lokali. Pas dhunës, Proga është futur në ambientet e brendshme të lokalit për disa minuta dhe më pas ka dalë jashtë, ku ka rënë në rrugë pa ndjenja. Edhe pse u transportua në spital, ai nuk mundi t’i mbijetonte plagëve dhe ndërrroi jetë.

Pas sherrit, Denis Meçi është larguar nga vendi i ngjarjes dhe është arrestuar sot. Bashkë me të janë arrestuar edhe 3 persona të tjerë, Voltan Shulku, 40 vjeç, Arian Manellari, 55 vjeç, dhe Leonidha Guçe, 47 vjeç, që dyshohet se kanë penguar zbulimin e krimit dhe nuk kanë kallëzuar ngjarjen. Ata përballen me akuzat për “Moskallzim krimi” dhe “Veprime që pengojnë zbulimin e së vërtetës”.

Denis Meçi akuzohet për veprën penale “Vrasja me dashje”. Materialet procedurale i janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm në Korçë për veprime të mëtejshme.