Shtetasi gjeorgjian Kakha Joua është identifikuar si njëri prej tre mashtruesve që arritën të zhvatin 140 mijë euro nga një pikë këmbimi valutor në Shkodër më 9 gusht. Joua, së bashku me dy bashkëpunëtorët e tij, të cilët janë shpallur në kërkim, kishin mbërritur në Shqipëri më 29 korrik. Ai ishte duke udhëtuar nga Sarajeva në Stamboll, me destinacion final kryeqytetin e vendlindjes së tij, Tbilisi. Pas ndalimit nga autoritetet turke, Joua u deportua në Tiranë të dielën, ku gjatë kontrollit fizik iu gjetën 7,500 euro, pjesë e parave të grabitura nga pika e këmbimit valutor në Zdrale të Shkodrës.

Hetuesit kanë zbardhur metodën e mashtrimit që përdorën këta individë. Ata i kërkuan kambistit të numëronte paratë dhe, pasi numëruan sasinë, i vendosën ato në dy zarfe dhe i futën në një çantë me ndarje të dyfishta. Për të mashtruar kambistin, ata në moment i dhanë dy zarfe të tjera që përmbanin një kartëmonedhë me vlerë 500 euro në fillim dhe në fund, ndërsa pjesa tjetër ishte mbushur me prerje gazetë në përmasat e kartëmonedhave. Gjeorgjianët kishin pretenduar se ishin shtetas ukrainas.

Në qershor të këtij viti, policia e Elbasanit kishte shpallur në kërkim dy gjeorgjianë të tjerë për mashtrimin e një kambisti me 40 mijë euro të falsifikuara. Hetimet janë në vazhdim për të zbuluar të gjitha rrethanat dhe lidhjet e mundshme të këtij grupi kriminal.