Në një gjendje të rënduar psikologjike, motra e Egli Progës ka pritur në derën e Gjykatës së Korçës mbërritjen e Kristi Meçes, i dyshuar si dhunuesi i Egli Progës, si dhe të tre personave të tjerë të akuzuar për moskallëzim krimi. Vrasja e Egli Progës ka ngjallur shqetësim dhe ka pasur një sërë paqartësish mbi dinamikën e ngjarjes dhe natyrën e vdekjes së tij.

Ngjarja e rëndë ka ndodhur mbrëmjen e së shtunës në qytetin e Pogradecit. Në orët që pasuan ngjarjen, u raportuan disa paqartësi mbi rrethanat e vdekjes, me spekulime se mund të kishte qenë një aksident si pasojë e konsumimit të alkoolit nga ana e viktimës. Në momentet e para, mediat raportuan se 42-vjeçari ishte gjetur në rrugë në gjendje të dehur dhe kishte ndërruar jetë si pasojë e një rënieje.

Megjithatë, konstatimet e para të mjekëve që tentuan t’i japin ndihmën e parë në spitalin e Pogradecit ngritën dyshime se i ndjeri mund të kishte qenë dhunuar. Verifikimet e mëpasshme të policisë, përfshirë pyetjen e dëshmitarëve dhe analizën e pamjeve nga kamerat e sigurisë, treguan se Egli Proga ishte dhunuar nga Denis Meçe dhe tre persona të tjerë, të cilët janë arrestuar nga policia e Pogradecit. Ngjarja kishte ndodhur jashtë ambienteve të një lokali.

Njoftimi i parë zyrtar nga policia u dha të nesërmen e ngjarjes, ku u njoftua arrestimi i personave të dyshuar për vrasjen e viktimës pas një konflikti për motive të dobëta.

Në mes të dyshimeve nëse policia e Pogradecit ka tentuar të devijojë dinamikën dhe autorësinë e ngjarjes, drejtori i përgjithshëm i policisë së shtetit, Muhamet Rrumbullaku, ka urdhëruar nisjen e një inspektimi në drejtorinë e policisë së Korçës. Ky inspektim do të shqyrtojë tërësinë e veprimeve dhe reagimit të punonjësve të policisë nga momenti i marrjes së njoftimit për ngjarjen, dhe do të synojë të nxjerrë përgjegjësitë dhe personat përgjegjës, nëse ata rezultojnë të tillë.