Gjykata e Krimeve të Rënda ka vendosur të lërë në burg Gazmir Preçin, shefin e Anti-Drogës në Durrës, i cili akuzohet për marrjen e 10 mijë eurove në këmbim të shantazhit ndaj pronarit të një lokali. Arrestimi i Preçit ka ndodhur pas denoncimit të pronarit të lokalit “Night”, një klub nate në Ura e Dajlanit.

Sipas denoncimit, Preçi i kishte kërkuar pronarit të lokalit një shumë prej 10 mijë eurosh, duke e kërcënuar se do të mbyllte biznesin e tij për arsye të pretenduara shkeljesh, si punësimi i personave të pasiguruar, një çështje që nuk është në kompetencën e tij për ta kontrolluar. Takimi ku u dha shuma e parave është mbikëqyrur nga hetuesit dhe është realizuar në një lagje të Tiranës, ku Preçi ra në grackën e kolegëve të tij sapo mori një pjesë të parave.

Preçi është akuzuar për “Shpërdorim detyre” dhe “Korrupsion pasiv”. Ministri i Brendshëm, Ervin Hoxha, ka reaguar duke theksuar se ky operacion dërgon një mesazh të qartë për ata policë që abuzojnë me pozitat e tyre dhe trajtojnë qytetarët dhe bizneset si prona personale. “Ata që tentojnë të cenojnë besimin e qytetarëve në Polici, duke vepruar si padronë dhe jo si shërbëtorë të ligjit, do të përballen me ndëshkimin më të ashpër ligjor,” ka deklaruar Hoxha.