Policia e Lezhës ka parandaluar një vrasje të mundshme në fshatin Gjormë, Kurbin, duke arrestuar një 53-vjeçar të armatosur, Luan Farruku, i cili dyshohet se po planifikonte të vriste kushëririn e tij, M.F., pas një konflikti mes tyre. Sipas njoftimit të policisë, viktima e planifikuar, M.F., kishte lajmëruar autoritetet pasi ishte kërcënuar për jetën me armë zjarri dhe kishte frikë se Luan Farruku do ta vriste atë në banesën e tij.

Policia ka reaguar menjëherë pas marrjes së denoncimit dhe ka organizuar një operacion të koduar “Cousin” në bashkëpunim me Forcat Kombëtare të Sigurisë dhe Njësinë Shkodër. Në këtë operacion, policia arriti të lokalizojë dhe arrestojë autorin e dyshuar në rrugën që të çonte pranë banesës së kushëririt të tij.

Gjatë arrestimit, Luan Farruku po lëvizte me një motomjet pa targa dhe ishte i armatosur me një pistoletë të mbushur dhe një thikë, të cilat janë sekuestruar nga policia së bashku me municionet që posedonte.

Ngjarja ka shqetësuar komunitetin lokal, por falë ndërhyrjes së shpejtë të policisë, një krim i rëndë u parandalua. Materialet procedurale ndaj Luan Farrukut janë referuar Prokurorisë së Lezhës për akuzat e “Mbajtjes pa leje dhe prodhimit të armëve, armëve shpërthyese dhe i municionit”, “Prodhimit, mbajtjes, blerjes apo shitjes pa leje të armëve të ftohta” dhe “Kanosjes”.