Ministria e Mbrojtjes ka raportuar se situata e zjarreve në vend ka shënuar një përmirësim të dukshëm gjatë 24 orëve të fundit, falë ndërhyrjes së shpejtë dhe të koordinuar të strukturave operacionale. Nga 53 vatra zjarri të raportuara, 47 prej tyre janë shuar dhe vënë nën kontroll, ndërsa aktualisht janë ende aktive 6 vatra zjarri.

Sipas raportit të ministrisë, vatrat e zjarrit që vijojnë të jenë aktive ndodhen në Bjeshkët e Bollotekut dhe mbi fshatin Tërnovë. Këto zjarre, megjithatë, nuk paraqesin rrezik të menjëhershëm për qytetarët dhe banesat.

Në operacionet për shuarjen dhe kontrollin e zjarreve kanë marrë pjesë 307 forca zjarrfikëse, 130 forca ushtarake, 58 efektivë nga policia e shtetit, 155 struktura të emergjencës civile të pushtetit lokal, 55 nga administrata e zonave të mbrojtura, 32 nga shërbimi pyjor dhe 151 vullnetarë. Ndihma e avionit Spartan nga Rumania ka qenë gjithashtu e rëndësishme për izolimin e vatrave problematike.

Ministria e Mbrojtjes ka bërë thirrje qytetarëve, veçanërisht fermerëve, që të shmangin ndezjen e zjarreve për çdo arsye dhe të raportojnë menjëherë çdo rast zjarri pranë autoriteteve përkatëse, për të parandaluar përhapjen e mëtejshme të tyre.