**
Policia ka arrestuar 20-vjeçarin italian, Salvadore Di Tella, pas një përplasjeje fatale me Jet-Ski që rezultoi në vdekjen e 19-vjeçarit Nicola Loro. Ngjarja e rëndë ndodhi në Velipojë, ku të rinjtë ishin duke kryer manovra të rrezikshme në ujë.

Përplasja, e cila ka qenë e fortë, shkaktoi plagë të rënda për Nicola Loro, i cili humbi jetën në Spitalin Rajonal të Shkodrës pas ndihmës mjekësore. Incidenti ndodhi rreth një milje larg nga perimetri i sigurisë në plazhin e Velipojës.

Në vijim të hetimeve nga grupi hetimor, nën drejtimin e Prokurorisë, u arrestua në flagrancë Salvadore Di Tella, 20 vjeç, banues në Napoli, Itali. Ai është vëllai i të fejuarës së viktimës, Nicola Loro.

Materialet janë dorëzuar në Prokurori për veprime të mëtejshme, dhe ndaj tij është ngritur akuzë për veprën penale “Vrasja nga pakujdesia”. Hetimet për këtë rast janë në vazhdim.