James Rodriguez është afër një rikthimi të bujshëm në La Liga, kësaj here me një kapitull të ri në Madrid. Sipas raportimeve nga “Marca,” ish-ylli kolumbian i Real Madridit ka mbërritur në kryeqytetin spanjoll për t’u bashkuar me ekipin e Rayo Vallecanos.

Aktualisht, palët janë në bisedime për të arritur një marrëveshje, dhe duket se gjithçka po ecën në drejtimin e duhur. James, i cili së fundmi përfundoi aventurën e tij në Brazil, pritet të bashkohet me Rayo Vallecanon si lojtar i lirë. Aty, ai do të jetë shok skuadre me mbrojtësin e Kombëtares shqiptare, Ivan Balliu.

Kolumbiani u transferua te Real Madridi para 10 vitesh, pas paraqitjes së tij të jashtëzakonshme në Kupën e Botës, dhe gjatë qëndrimit të tij në klub, ai arriti të fitojë dy herë trofeun e Champions League me “Los Blancos”.