Ministri i Brendshëm, Ervin Hoxha, priti sot në takim Ngarkuarën me Punë të SHBA-ve në Tiranë, Nancy VanHorn, me të cilën diskutoi mbi marrëdhëniet dypalëshe dhe theksoi miqësinë e fortë mes dy vendeve, bashkëpunimin dhe partneritetin strategjik të fortë.

Ministri Hoxha shprehu mirënjohje për mbështetje e pakursyer të SHBA-ve ndaj agjencive ligjzbatuese të Shqipërisë, me një theks të veçantë në programin ICITAP, që fokusohet në asistencën për Policinë e Shtetit.

Në lidhje me takimin, Ministri Hoxha u shpreh: “Ishte kënaqësi të takoja sot të Ngarkuarën me Punë të SHBA në Tiranë, Nancy VanHorn. Në këtë takim, konfirmuam jo vetëm miqësinë mes dy vendeve, por gjithashtu ritheksuam partneritetin e fortë strategjik.” Ai theksoi gjithashtu se “e njohu znj. VanHorn me disa prej prioriteteve në detyrën e tij si Ministër i Brendshëm dhe e falënderoi për kontributin e çmuar të programit ICITAP në rritjen e parametrave të sigurisë për Policinë e Shtetit dhe agjencitë ligjzbatuese shqiptare.”

Gjatë takimit, u diskutua gjithashtu për tema të tjera me interes për qytetarët e të dy vendeve. “Folëm në këtë takim të parë mbi mundësitë e reja të thellimit dhe zgjerimit të bashkëpunimit për mirëqenien e qytetarëve tanë,” tha Ministri Hoxha pas takimit.