Interpol Tirana, në bashkëpunim me partnerët e tyre në Gjermani, kanë arrestuar dy shtetas shqiptarë të shpallur në kërkim ndërkombëtar.

Sipas njoftimit të këtyre strukturave, të arrestuarit janë Fabio Ballabani, lindur në Vlorë, dhe Erland Krasniqi, i lindur në Kavajë.

Fabio Ballabani, i njohur edhe me emrin Fabio Zyberaj, është akuzuar për kanosje me armë zjarri ndaj bashkëshortit të një gjyqtareje në vitin 2019. Ky akt ka ndodhur në kontekstin e një gjyqi që zhvillohej kundër grupit të Emiljano Shullazit.

Ndërsa Erland Krasniqi është i akuzuar për plagosje me armë zjarri ndaj shtetasit Renato Bajraktari pas një konflikti për motive të dobëta.

Tani, Interpol Tirana po bashkëpunon me Interpol Wiesbaden në Gjermani për të organizuar ekstradimin e këtyre dy personave drejt Shqipërisë.