Gjykata e Tiranës ka lënë të pandryshuar masën e sigurisë “arrest në burg” për Andrew Bode, i cili është i dyshuar për përfshirje në vrasjen e Edmond Papës në zonën e Selitës, një ngjarje e ndodhur në vitin 2022. Gjatë seancës gjyqësore, Bode ka mohuar çdo lidhje me këtë vrasje, duke deklaruar se nuk ndodhej në vendngjarje në momentin e krimit.

Gjithashtu, Gjykata e Gjirokastrës ka caktuar masën e sigurisë “Arrest në burg” edhe për dy persona të tjerë, Andrea Kalemin dhe Julian Kalemin, të cilët po ashtu akuzohen për përfshirje në vrasjen e Edmond Papës.

Gazetari Ermal Vija raportoi se Bode ka theksuar para gjykatës se do të paraqesë dëshmitarë që do të vërtetojnë se ai nuk ka qenë në Selitë në momentin e vrasjes. Bode gjithashtu shpjegoi se arsyeja e fshehjes së tij për një periudhë të gjatë ishte mungesa e besimit te policia.

“Andrew Bode pretendoi se do të sillte dëshmitarë që do të konfirmonin se ai nuk ndodhej në Selitë kur ndodhi ngjarja. Sa i takon fshehjes së tij, ai deklaroi se nuk kishte besim tek policia,” tha gazetari Vija.

Sipas Vija, ngjarja e vrasjes së Edmond Papës është pjesë e një përplasjeje mes dy grupeve kriminale, Sadikaj dhe Pepa, e cila ka rezultuar në humbjen e jetës së shtatë personave që nga qershori i vitit 2022. Familjarët e Aleksandër Sadikajt kanë shprehur dyshime se vrasja e tij është kryer nga të afërm të Edmond Papës.