Gjatë një interviste me gazetarin Steve Clemons në Forumit që po mbahet në Pragë, Kryeministri i Shqipërisë, Edi Rama, ka trajtuar disa çështje të rëndësishme për vendin dhe rajonin. Në përgjigje të pyetjes nëse Rusia ka bërë përpjekje për të minuar qeverinë shqiptare, Rama deklaroi se Shqipëria nuk ka pasur ndonjë lidhje të drejtpërdrejtë me Rusinë dhe se nuk ka pasur probleme të tilla brenda territorit shqiptar.

“Për shkak të historisë sonë, ne kemi qenë si Koreja e Veriut e Europës, Praga për ne ka qenë po aq e paarritshme sa Parisi në komunizëm. Dhe kur rusët vendosën të hiqnin qafe Stalinin, ne i qëndruam stoik. Duke qëndruar te Stalini dhe duke qenë stalinist deri në ’90, na bënte vendin më pak interesant për Rusinë. Deri sot s’ka pasur një vizitë në Moskë dhe askënd se ka marrë malli. Ne nuk duam asgjë të keqe për Rusinë,” tha Rama.

Ai shtoi se Shqipëria nuk është e interesuar për ndërhyrje ruse dhe se nuk ka spiunë të gatshëm të shërbejnë për Rusinë për pak para. Rama theksoi se problemi më i madh është në pjesët e tjera të Ballkanit, dhe se është e nevojshme që Serbia dhe Kosova të dalin nga konflikti. Ai theksoi rëndësinë e mbajtjes së Serbisë sa më shumë në anën e Shqipërisë për të ruajtur stabilitetin në rajon.