Një filmim i fundit ka zbuluar momentin kur ushtria izraelite ekzekuton komandantin e militantëve të Hamasit në Bregun Perëndimor, Uisam Hazem. Ky sulm me dronë ka ndodhur në qytetin Xhenin dhe ka rezultuar në vrasjen e Hazemit, së bashku me dy persona të tjerë të armatosur. Sipas raporteve, ata ishin duke transportuar armë, municione dhe shuma të mëdha parash.

Ky operacion është pjesë e një fushate anti-terrori që Izraeli ka nisur në Bregun Perëndimor që prej të Mërkurës. Kjo fushatë është konsideruar si më e madhja në dy dekadat e fundit dhe zhvillohet paralelisht me luftën në Rripin e Gazës, duke shtuar ndjeshëm tensionet në Lindjen e Mesme.

Që prej fillimit të operacioneve të ushtrisë izraelite, janë ekzekutuar 19 persona. Ndërkohë, qeveria izraelite ka pranuar një plan për armëpushime të pjesëshme lokale nga data 1 Shtator në Rripin e Gazës. Këto armëpushime janë të ndërmjetësuara nga Organizata Botërore e Shëndetësisë dhe pritet të zgjasin jo më shumë se 3 ditë, me qëllim të hapjes së rrugës për vaksinimin kundër Poliomelitit të fëmijëve në këtë rajon.