Tre persona të shpallur në kërkim ndërkombëtar janë ekstraduar drejt Turqisë dhe Italisë, sipas një njoftimi të fundit nga policia.

Njëri prej të ekstraduarve është shtetasi turk Koray Anic, 36 vjeç, i cili u dërgua në Turqi. Gjykata e Stambollit e ka dënuar atë në vitin 2024 me 4 vjet, 6 muaj dhe 5 ditë burgim për akuza të rënda si rrëmbim, posedim të armëve të zjarrit dhe armëve shpërthyese, si dhe për kanosje.

Ndërkohë, dy shqiptarë janë ekstraduar drejt Italisë. I pari është Mërgim Lazri, 27 vjeç, i lindur në Dibër. Ai ishte në kërkim nga Gjykata e Torinos, e cila në vitin 2023 i ka caktuar masën e sigurisë “Arrest në burg” për grabitje me armë, që përfshinte dhe plagosjen e një pronari banese në Itali në vitin 2021.

I dyti është Andrea Ajasllari, 49 vjeç, nga Skrapari. Ai u ekstradua në Itali pasi Gjykata e Komos e dënoi në vitin 2023 me masën “Arrest në burg” për shfrytëzim për prostitucion dhe kanosje.