Aktori i humorit Osman Azemi ka qenë në qendër të vëmendjes së mediave në ditët e fundit, pas një interviste televizive ku ai deklaroi se shqiptarët janë xhelozë për Kosovën. Këto deklarata kanë shkaktuar mjaft polemika dhe keqkuptime, duke e bërë aktorin një temë të nxehtë diskutimi.

Së fundmi, Azemi ka kërkuar falje për mënyrën se si është shprehur. Ai ka shprehur keqardhjen për efektin që kanë pasur komentet e tij dhe ka theksuar se deklaratat e tij janë keqinterpretuar.

“Duhet të jem shumë i kujdesshëm për atë që them, sepse dëmi bëhet. Deklaratat e mia janë keqinterpretuar. Qëllimi im ka qenë të flas për sport, kuptohet se sporti na emocionon. Gjatë intervistës ka ndodhur një gabim, pasi unë kam përdorur një lloj satire dhe humor, por kjo ka marrë përmasa të jashtëzakonshme dhe ndihem keq,” tha Azemi.

Ai shtoi më tej: “Nuk do të kisha dashur të shihja shqiptarët e Kosovës, Shqipërisë, Maqedonisë së Veriut, apo Malit të Zi të përçarë mes tyre. Sinqerisht, ndiej keqardhje edhe për qytetarët në Shqipëri, qofshin të majtë apo të djathtë, dhe për ata që janë në qeveri apo opozitë, për miqtë dhe familjarët e mi që i kam vendosur në një situatë të sikletshme. Ju kërkoj falje edhe bashkëpunëtorëve të mi nëse janë ndjerë të sikletosur. Tani është bërë, dhe dëmi është bërë,” përfundoi aktori.