CNN ka publikuar pamje të rënda që tregojnë momentin kur ushtria ruse ekzekuton tre ushtarë ukrainas të cilët ishin dorëzuar dhe ishin gjunjëzuar. Videoja, e cila është bërë virale në mediat sociale, është një dëshmi e qartë e shkeljeve të rënda që Moska po i bën ligjit ndërkombëtar në konfliktin në Ukrainë. Ngjarja e rëndë ka ndodhur në qytetin e Pokrovskut, në lindje të Ukrainës, gjatë muajit gusht të këtij viti.

Sipas burimeve nga inteligjenca ukrainase, të cilat kanë informuar CNN, ky nuk është një rast i izoluar. Janë raportuar të paktën 15 raste të ngjashme ku ushtarët rusë kanë vrarë ushtarë ukrainas të dorëzuar, në vend që t’i marrin si robër, siç kërkohet nga ligji ndërkombëtar.

Në një reagim të fuqishëm ndaj këtyre zhvillimeve, Sekretari i Përgjithshëm i NATO-s, Jens Stoltenberg, ka bërë thirrje për ndalimin e mbështetjes së Kinës për luftën e paligjshme të Rusisë. Gjatë një takimi për shtyp në Oslo me kryeministrin norvegjez Jonas Gahr Støre, Stoltenberg theksoi se Kina duhet të ndalojë së ushqyeri konfliktin më të madh ushtarak në Evropë, përndryshe do të përballet me pasoja të rënda për interesat dhe reputacionin e saj.

“Kina është bërë një bashkëpunëtor vendimtar në luftën e Rusisë kundër Ukrainës, përmes partneritetit dhe mbështetjes së pakufizuar për industrinë ruse të mbrojtjes, duke përfshirë transferimin e komponentëve të armëve, pajisjeve dhe lëndëve të para,” shtoi ai, duke nënvizuar rëndësinë e përfundimit të këtij bashkëpunimi.