Masakra në shkollën e mesme Apalachee në Xhorxhia, e ndodhur më 4 Shtator, ka lënë pas vetes 4 të vrarë dhe 9 të plagosur. Hetimet e FBI-së kanë zbuluar një fakt tronditës: autori i dyshuar, 14-vjeçari Colt Grey, kishte marrë armën e përdorur në krim si dhuratë për Krishtlindje nga babai i tij. Sipas njoftimeve nga “La Repubblica”, babai i Colt, Colin Grey, 54 vjeç, është arrestuar dhe akuzohet për katër akuza për vrasje nga pakujdesia, dy akuza për vrasje të shkallës së dytë dhe tetë akuza për mizori ndaj fëmijëve.

Arrestimi i Colin Grey ka lidhje me faktin se ai e kishte lejuar djalin e tij të kishte akses në armën e gjuetisë të stilit AR që u përdor në të shtënat. Sipas hetimeve, vjet ata ishin hetuar për një incident kërcënimi me armë, dhe në atë rast, babai kishte thënë se armët ishin të siguruara dhe se djali nuk kishte akses të pambikëqyrur në to. Megjithatë, këtë herë, hetuesit zbuluan prova të tjera që e kundërshtojnë këtë pohim.

Pak orë përpara arrestimit, presidenti amerikan Joe Biden ka sugjeruar që prindërit të mbajnë përgjegjësi për armët që ndodhen në shtëpitë e tyre dhe që mund të jenë të aksesueshme nga fëmijët. Në një deklaratë nga Wisconsin, Biden theksoi rëndësinë e ruajtjes së armëve në një vend të sigurt dhe të mbikëqyrur, duke bërë thirrje për ndëshkime për ata që nuk e bëjnë këtë.

Ngjarja ndodhi në shkollën e mesme Apalachee në Winder, Xhorxhia, ku 14-vjeçari Colt Grey hapi zjarr dhe shkaktoi këtë tragjedi.