Policia e Shkodrës ka zbardhur atentatin e tronditshëm që ndodhi një javë më parë, ku u vra Elis Rroshkodoli. Ngjarja e rëndë ka ndodhur më 30 gusht 2024, kur 36-vjeçari Rroshkodoli po qëndronte në verandën e një lokali në lagjen “Ahmet Haxhia”. Persona të maskuar janë afruar me makinë dhe kanë qëlluar me breshëri plumbash drejt tij.

Në kuadër të operacionit të koduar ‘Fjalëkryqi’, policia njoftoi sot, më 6 shtator 2024, se ka arrestuar Xhulio Malon, 26 vjeç, i akuzuar për sigurimin e kushteve dhe mjeteve për kryerjen e vrasjes. Po ashtu, janë shpallur në kërkim tre bashkëpunëtorët e tij, të dyshuar si vrasës me pagesë: J. Xh., 31 vjeç, V. Xh., 38 vjeç dhe D. M., 42 vjeç. Ende nuk është identifikuar porositësi i atentatit.

Sipas njoftimit të policisë, Xhulio Malo është identifikuar dhe arrestuar për veprat penale “Sigurimi i kushteve dhe i mjeteve materiale për të kryer vrasje”, “Veprime që pëngojnë zbulimin e së vërtetës” dhe “Trafikimi i mjeteve motorike”, kryer në bashkëpunim. Ndërsa, për veprat penale “Vrasja me paramendim”, “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit” dhe “Trafikimi i mjeteve motorike”, janë shpallur në kërkim shtetasit J. Xh., 31 vjeç, V. Xh., 38 vjeç dhe D. M., 42 vjeç.

Nga hetimet, dyshohet se këta katër shtetas kanë organizuar dhe kryer vrasjen e Elis Rroshkodolit. Pas qëllimeve me 18 plumba, autorët dyshohet se kanë çmontuar makinën Benz C Class ngjyrë gri në përpjekje për të fshehur gjurmët në një garazh në Mullet. Policia ka dyshime se garazhi në Mullet është përdorur si bazë për të fshehur makinat që janë përdorur gjatë kryerjes së krimeve.

Grupi i Vrasësve me Pjesë

26-vjeçari Xhulio Malo, nga Gjirokastra, nuk është një emër i panjohur për policinë. Në moshën 17 vjeçare, ai kishte qenë anëtar i ‘grupit të zjarrit’ të grupit të Gate Mahmutajt në Lazarat, që në vitin 2015 vrau efektivin e RENEA-s Ibrahim Basha. Në vitin 2018, gjykata e Apelit e Krimeve të Rënda dënoi Xhulio Malon me 10 vjet burgim, ndërsa ai u lirua në 2020 pas përfitimit nga amnistia. Të katër autorët mendohet se janë pjesë e një grupi të vrasësve me pagesë.

Në kuadër të këtij operacioni, në bashkëpunim me shërbimet e DVP Tiranë, u zbulua një garazh në territorin e bashkisë Tiranë ku këta katër shtetas mbanin automjete të trafikuara nga shtete të ndryshme të Europës, të cilat dyshohet se janë siguruar për të shërbyer gjatë kryerjes së krimeve të rënda. Nga kontrollet në këtë ambient u gjetën dhe u sekuestruan në cilësinë e provës materiale 3 automjete të dyshuara të trafikuara dhe pjesë të automjetit të dyshuar të përdorur nga autorët gjatë vrasjes së Elis Rroshkodolit.

Tre makinat do të verifikohen nëse janë përdorur për të kryer vrasje të tjera ose në ngjarje të tjera kriminale.